Ел тұмар Ақпараттық портал
Шырайлы деген атауы бар Шымкент расында күн өткен сайын көркейіп келеді. Шымшаһарда жалпы 156 орталық көше, 8 саябақ, 32 гүлзар, 46 ескерткіш бар. Көшенің де, саябақтың да тазалығына жауапты мекемелер шырайлы қаланың шырайын арттыруды өздерінің міндеті санайды. Үшінші мегаполис тұрғындарының мәдени сауаттылығын арттыру да басты назарда. Ол үшін үгіт-насихат жұмыстары ұдайы жүргізілуде. Көшеге пісте шақпау, қоқыстарды бей-берекет шашпау туралы билбордтар ілінген. Қала тұрғындары көріктендіру жұмыстарына бір-бірімен жарыса атсалысуға тырысады. Өз ауласы мен көшесін гүлдендіріп, «Таза қала» байқауына қатысушылар қатары да күн санап артып келеді. Қаланың тазалығына «ЛТД Тұрмыс», «СМД-Құрылыс», «Бәйтерек-ЛБ», «Югдорсервис» ЖШС мердігер мекемелері жауапты. Қазір атқарылатын жұмыстың негізгісі – көшелерді жуу, қала аумағындағы гүл, ағаш сынды жасыл желекті күтіп ұстау, суару жұмыстары кестеге сай атқарылуда. Бұл шаруалар көбіне кешкі және түнгі уақыттарда атқарылады, дейді жауапты мамандар.