Ел тұмар Ақпараттық портал
Түркістан облысында балық шаруашылығының өрісі кеңейіп, қарқынды дамып келеді. Шардара ауданында бүгінгі күнге дейін балық, мақта, мал шаруашылығы мен көкөніс пен бау-бақша бағыттарында 19 кооператив құрылды. Шардара ауданындағы «Хамит» өндірістік кооперативі өңіріміздегі индустриалды-инновациялық даму бағдарламасы шеңберінде ашылған. Өндірісі өрлеген кооператив бүгінде өндірген өнімін алыс та жақын шетелдерге экспорттап отыр. Айта кетейік, «Хамит» өндірістік кооперативінде балықтың 10 түрі әзірленеді. Сапалы өнім шығаратын кәсіпорын жылына 3 мың тоннаға дейін балық өңдейді. Жалпы өнімнің 70 пайызы Ресей, Германия және Израиль сынды елдерге экспортталса, ал 30 пайызы ішкі нарыққа саудалануда. Жалпы облыста бүгінде 3 балық өңдеу зауыты мен 28 балық шаруа қожалығы бар. Бұл кәсіпорындарда жылына 6 мың тонна балық өңделеді. Алдағы уақытта да осы саланың даму көкжиегін кеңейтіп, субсидиялау мәселесін шаруаларға түсіндірген басқарма басшысының орынбасары балық шаруашылығында коопертивтер құру арқылы өнімнің көлемін ұлғайтуға болатынын жеткізді. Балық шаруашылығын кәсіпке айналдырған Шардарада бүгінде 3 балық өңдеу зауыты жұмыс істейді. Оның ішінде «Хамит» және «Шардара балық – 1» кәсіпорындары өз жұмыстарын жолға қойып үлгерген. Ал өткен жылы Үдемелі индустриалды-инновациялық даму бағдарламасы шеңберінде тағы бір зауыт іске қосылған. Балық өңдеу кәсіпорында 40 адам жұмыспен қамтылған.