Ел тұмар Ақпараттық портал
Шымкент қаласында AR-shymkent– виртуалды жобасы қолға алынды.
Жобаның мақсаты — туризм саласын цифрландыра отырып, идеологиялық, ақпараттық-танымды дәстүрлі жарнамалық шығындарды азайту, заманауи технологияларды қолданудың кері байланыстағы рөлін насихаттау болып табылады.
AR-shymkent QR-кодының көмегімен туристер өз смартфондарына Шымкенттегі тарихи ескерткіштердің тарихы, жай-күйі туралы ақпарат ала алады. Яғни AR-shymkent аудио, видео, фотоақпараттарды интерактивті нысанда және 3D нысанда көруге мүмкіндік береді.
Қалалық цифрландыру басқармасы мамандарының айтуынша, жобада екі виртуалды ақпараттандырушы қызмет көрсетеді. Біріншісі — қаланың географиялық жағдайы туралы жол көрсетуші виртуалды гид болса, екіншісі — сол нысанның немесе тұлғаның (ескерткіштің) тарихын, я өмірбаянын айтатын видеобаяндамашы.
Қаладағы 103 қоғамдық орында QR-коды бар 830 арнайы белгі орнатылады. Атап айтқанда кинотеатрлар, сауда үйлері, саябақтар, автобустар, қонақ үйлер мен қоғамдық орындар таңдалған.
Қазіргі таңда жобаны іске қосушы компаниямен келісімшартқа сәйкес жұмыстар атқарылып жатыр. Туризм саласының қаланың экономикалық-әлеуметтік дамуына қосар үлесі көп екенін ескерсек, бұл жүйенің пайдасы да көп болмақ.
Шымкент қаласы әкімінің баспасөз қызметі