Қазақстанның Норвегиядағы Елшісі Әділ Тұрсынов Роголанн провинциясының губернаторы Бент Хёймен, Берген қаласының мэрі Линн Кристин Енгёмен, Ставангер қаласы мэрінің орынбасары Дагни Хаускенмен және Тиме муниципалитеті мэрінің орынбасары Петтер Стабелмен кездесті.

Елші сұхбаттастарды Президент Қасым-Жомарт Тоқаевтың бастамасымен Қазақстанда жүргізіліп жатқан саяси реформалар, сондай-ақ еліміздің экономикалық әлеуеті туралы хабардар етті. Тараптар Қазақстан-Норвегияның өңіраралық ынтымақтастығын құру перспективаларын қарастырып, болашақта Ставангер мен Берген қалаларында бірлескен іскерлік шаралар өткізу жоспарларын талқылады. Оның ішінде мұнай және газ, жасыл технологиялар, жаңартылатын энергия көздері, аквамәдениет, ауыл шаруашылығы, сондай-ақ Транскаспий халықаралық көлік дәлізі арқылы сауданы ілгерілету салаларындағы бастамаларға басым көңіл бөлінді.

Қазақстандық дипломаттың Норвегияның батысында орналасқан «Ennox Technology», «StormGeo» және «Framo Group» компанияларға сапары барысында екі ел арасындағы бірлескен жобаларды жүзеге асыру мүмкіндіктері талқыланды.

Ставангер университетінің ректоры Клаус Монмен кездесу барысында жоғары білім саласындағы, атап айтқанда, Қазақстанда шетелдік университеттердің филиалдарын ашу, академиялық алмасу, кадрларды даярлау, университеттер арасындағы серіктестік және білім беру жәрмеңкелерге қатысу мәселелері бойынша диалог перспективалары белгіленді.

Ә. Тұрсынов Норвегияның Ставангер қаласында өткен шахмат турниріне қатысқан қазақстандық балалармен де кездесті. Еліміздің спортшылары турнирдің жүлделі орындары үшін табанды күрес көрсетті, ал олардың ішіндегі 4 жастағы отандасымыз турнирдің ең жас қатысушысы болды.

«Bike for Peace» қозғалысының жетекшісі Торе Наерландтың көмегімен Қазақстан Елшісі Брюне қаласында орналасқан «Nei Til Atomvåpen» (NTA – No to Nuclear Weapons) ұйымымен кездесті. Іс-шара елміздің қазіргі заманғы дамуы, сондай-ақ Мемлекет басшымыздың халықаралық қауіпсіздікті қамтамасыз ету, ядролық қарусыздану және таратпау үдерістерін ілгерілетуге салған күш-жігеріне арналды.

Жалпы, сапар кең перспективаларды және норвегиялық өңірлердің елімізге қатысты өсіп келе жатқан қызығушылықты, сондай-ақ тараптарды өзара қызықтыратын көптеген салаларда Қазақстанмен ынтымақтастықты жандандыруға деген ықыласты көрсетті. Тараптар екіжақты қатынастардың барлық спектрі бойынша өңіраралық ынтымақтастықты жандандыруға, сондай-ақ биылғы жылдың күзінде Ставангер мен Бергенде іскерлік іс-шаралар өткізуге келісті.