Түркістанда18 балалы отбасы бар

«Бір баласы бардың шығарда шықпас жаны бар, он баласы бардың орда бұзар қолы бар». Бүгінде Жұмашевтар әулиеті Түркістан облысына түгел мәлім. Кентау қаласының тұрғындары 18 баланы тәрбиелеп, ұлдарына отау құрып, қыздарын құтты орнына қондырған мерейлі отбасы. Алып бәйтеректей тамырын тереңге жайған жанұяның негізі84 жастағы Ысқақ қария мен жұбайы Гүлжахан Керімбайқызы.

Қиын қыстау заманда бас құрап, 5 баланы дүниеге әкелген қариялар елге көмегім тисін деген мақсатпен 13 тастанды баланы қамқорлығына алады. Бесеуі ес біліп қалған 4-7 жаста келген. Уақыт өте олардың ата-аналары аяқтан тұрып алған соң перзенттерін алып кеткен.Гүлжахан әжей мен Ысқақ қария балаларды бағу үшін ешкі асырап, соның сүтін беріп өсірген екен. Бір мезгіл ана сүтін ішсін деп, келіндері де балаларды емізіп келген. Қыздар шаңырақтың кенже ұлы мен келінін «ана», «әке» атап кеткен. Қыздардың оқуға түсуі, керек жарағын алып беру, тұрмысқа шығарарда артынан апаратын жасауы, бесік апару сынды шығынның барлығын кенже ұл мен келін өз міндеті санайды. Өздерінің екі қыз, бір ұлы бар, төрт қызбен қосқанда жеті перзент. Көпшілік жиындарда Гүлжахан апа келінім алтын алқа иегері деп мақтанып айтып отырады екен.

«Төрт қыздың үлкені 24-те, кішісі 22 жаста. Балалар үйі ашылған жылдары өзідеріңіз білесіздер, елдің жағдайы қиын болды. Азық-түлік кезекпен берілді, жылу, газ деген болмады. Жарық жоқ. Сегіз бесікті қатар қойып, күн-түн демей, тербетіп өткен күндер болды. Уақыт өтіп төртеуін аналары алып кетті. Төрт қыз біздің отбасында қалды. Шынымды айтсам, сол жылдары өмір тоқтап қалған секілді күй кештім. Қазір бәрі артта», —дейді кейуаналар