Ел тұмар Ақпараттық портал
Аналарды ардақтап, құрмет тұту – жалпыға ортақ парыз. Отбасы берекесінің ұйытқысы болған асыл жандарға Қазығұрт билігі ерекше құрмет көрсетті. Шанақ, Ақжар ауылдарында тұратын Қазығұрттық 50 батыр ана Түркістан облысының орталығымен танысып, киелі жерлерді аралады. Алтын құрсақты аналар алдымен, көне Отырардағы Арыстанбаб кесенесіне табан тіреді. Ондағы сәулеті келіскен ескерткіштің тарихымен танысып, баба рухына құран бағыштады.
Қасиетті жердің кереметімен танысқан аналар қауымы мұнан соң Қожа Ахмет Ясауи кесенесіне барды. Онда кесенедегі көне жәдігерлермен танысты. Ақ жаулықты аналар әсіресе, бүкіл түркі жұртының рухани астанасы атанған Түркістан қаласының облыс орталығы болғанына қуанып, ризашылығын білдірді.
Ана қуанышы — әр үйдің, отбасының, мерейі. Әлемдегі бар жақсылық аналардан тарайды. Әйелдер шаңырақтың ұйытқысы, ырыс пен ынтымақтың алтын діңгегі. Бүгінде нәзік жандылар қоғамның барлық саласында белсенді. Олар қандай қызмет атқарса да, аналық міндетін қаперден шығармайды.